稱22日無戴口罩 羅致光網誌招罵

稱22日無戴口罩 羅致光網誌招罵

17/02/2020

    勞工及福利局長羅致光（CK）噚日喺網誌話，自己過去22日無用過一片口罩，係間接慳咗畀有需要用口罩嘅人。佢話自己無去人多嘅地方，返政總全部都係自己駕車，無坐公共交通工具，所以無用口罩。CK呢番言論畀網民狠批離地，話唔係個個市民都可以有私家車同私人辦公室。

    CK喺網誌話，由年初一至今（16日）嘅22日，佢日日喺政府總部開會討論防疫工作，話雖然大部分勞福局同事都係居家工作，但喺必須時都會返去開會。而CK自己除咗開會，很多時都係「office alone（單獨工作）」，因此過往22日一片口罩都無用過。

網民：唔係個個有車有私人辦公室

    特首林鄭月娥早前要求政府部門按準則戴口罩，話如果有官員唔符要求，「戴咗（口罩）都要除落嚟」。CK按準則辦事唔戴口罩，但市民似乎唔受落，網民狠批佢離地，問CK 「 何不食肉糜」。有網民話如果政府可以每一個市民送一架車，並且資助泊位、 油費同隧道費等，咁一定慳到口罩；亦有網民話如果政府炒咗CK，係「直接幫香港市民慳好多錢」。

    羅致光指，明白社會對他有關言論的看法，但他只是分享事實，又指口罩供應緊絀，所以盡量減少社交接觸。