流亡港人發起《2021香港約章》 表明唔會以團體做任何活動 Emily

流亡港人發起《2021香港約章》 

表明唔會以團體做任何活動

Emily   15/03/2021

    一班流亡海外嘅港人3月14日發起《2021香港約章》，發起人包括立法會前議員羅冠聰、許智峯，曾闖入立法會嘅梁繼平同流亡德國嘅黃台仰等8人。

參考劉曉波哈維爾   記錄時代聲音

    《約章》有4個部分，包括講述離散港人嘅信念，例如「抗爭運動應避免派系之爭和海外運動泡沫化，將能量消耗在內部角力」等。發起人表明唔會以團體作任何活動，阿聰就話《約章》展示離散社群嘅團結，記錄咗時代嘅聲音。

    8個發起人噚日舉辦網上記者會，佢哋認為已故諾貝爾和平獎得主劉曉波起草《零八憲章》、捷克前總統哈維爾發起嘅《七七憲章》等，都係民權運動嘅標竿性文章，等後世人記得當時群衆嘅想法，佢哋希望《約章》都有呢種功能。

話跨越黨派信念    放下自我做國際倡議

    《約章》共有25項，提出應以跨越黨派嘅信念做國際倡議工作，盡力連結更多支持香港嘅盟友。雖然發起人嘅政治光譜不一，但話喺打壓同埋香港民主運動前，都已經放低自我。

    身在英國嘅羅冠聰話，喺2019年間，唔少人以國際關注衡量反修例運動嘅進展，佢強調流亡港人會繼續為港發聲，鞏固國際關注。阿聰話北京通過香港嘅政改後，更加需要凝聚民主聲音，呼籲認同《約章》價值嘅離散港人、團體參與聯署。