融樂會創辦人移居海外 未透露去邊 王惠芬第二次做新移民 Emily

融樂會創辦人移居海外   未透露去邊 

王惠芬第二次做新移民

Emily   29/03/2021

    香港近年政治環境下，唔少人移民離開，原來當中包括融樂會創辦人王惠芬（Fermi）。國際關係學者沈旭暉前晚上載訪問Fermi嘅片段，Fermi話離港係「百般不情願，亦好突然」，去到外國亦好記掛香港初選47人案等事態發展。Fermi現時開始適應外地生活，本身由內地來港嘅佢，形容自己係「人生第二次做新移民」，同時亦覺得要畀心機，睇吓有冇乜嘢可以做。

    Fermi喺訪問中未有透露自己現時所在地方，只係話要租airbnb單位，該區有好多塗鴉，亦有唔少黑人、回教徒聚居。

落腳社區黑人、回教徒聚居

門外見針筒   喚起做社工熟悉感

    佢話好多朋友都提佢夜晚要小心、唔好出街，但佢自己非常鍾意當地，欣賞塗鴉次文化，甚至即使門外有針筒，都喚起佢當年做外展社工嘅熟悉感，唔會覺得恐懼。

話國安法嚇怕港少數族裔

    Fermi又提到，《港區國安法》生效後，香港土生土長嘅少數族裔會更加覺得政治可怕、恐懼。佢舉例，印度裔社工安德里早前因參與民主派初選被捕，成個社區都嚇親，覺得更加證明中國人嘅政治「我哋（少數族裔）唔掂得、我哋無份」，會嚇怕佢哋、令佢哋唔敢參與政治。