黃應士5000萬捐浸大傳理學院 「與亡妻相知相愛之地」

黃應士5000萬捐浸大傳理學院 

「與亡妻相知相愛之地」

08/10/2020

    有「香港新聞教父」之稱嘅資深新聞工作者黃應士，噚日向香港浸會大學捐咗5000萬元成立「黃沈慧珍紀念基金」，以紀念其已故妻子，並藉此基金推動浸大傳理學院嘅策略發展及新聞教育，今次捐款更係浸大傳理學院成立以來收到嘅最大筆捐款。

學院收過最大額捐款

    黃應士喺噚日舉行嘅協議簽訂儀式上話，對於浸大傳理系（即𠵱家嘅傳理學院），佢總有一份難以言喻嘅特殊感情，因為呢度係佢同太太相遇、相識、相知同相愛嘅地方，雖然已經差唔多係半世紀以前嘅舊事，但記憶歷久彌新，一直珍藏喺佢心坎裏面。

    浸大話，今次捐款會重點支持多個項目，包括設立「傳媒倫理操守教授席」；設立專門為現職新聞從業員設立嘅「新聞專業院士計劃」；設立3個獎學金；舉辦國際研討會、傑出學人講座系列、大師班及工作坊等特色項目。