駱惠寧探訪 劏房男曾捐近百萬內地抗疫

駱惠寧探訪 劏房男曾捐近百萬內地抗疫   

03/10/2020

    中聯辦主任駱惠寧「出巡」，10月1日探訪咗個深水埗失業劏房戶，佢話𠵱家淨係打散工，妻女都要返湖南生活。有眼利嘅市民發現，呢名劏房戶今年6月喺《北京日報》寫過文，去過清連儂牆同「保衛立法會」。親中報紙仲同佢做專訪，原來住劏房嘅佢都有唔少儲蓄，聲稱捐咗近百萬元畀內地抗疫。

    呢名劏房戶叫做徐天民，據佢喺《北京日報》嘅文章，話自己2013年由湖南嚟香港做廚師，之後升做後廚主管，舊年見反修例事件，「決心要做點什麼」，於是去「撐警察、清路障」，仲清過連儂牆，今年5月《國歌法》喺立法會通過時更去「保衛立法會」48小時。

駱惠寧送果籃報答 「唔捨得食」

    《文匯報》噚日報道呢位徐先生，話佢舊年10月畀酒樓炒咗，喺地盤做緊散工，𠵱家劏房月租4500元；但原來佢啲積蓄都唔少，喺內地有層樓，報道寫佢愛國撐警清連儂牆行動，統統自己出錢，使咗10萬元，而今年疫情仲「賣樓救國」，話賣咗內地層樓，跟住買咗幾十萬元嘅防疫物資同捐10萬元現金畀家鄉抗疫，前前後後使咗近百萬。對於呢顆愛國心，駱惠寧就送咗月餅、果籃同抗疫用品報答，徐先生仲話唔捨得食。