因初選被捕 喪女爸為弱勢不停步
警檢手機電腦 失工作心血女兒回憶
黃詩雅 (明報記者) 17/01/2021
警方月初大舉搜捕在去年7月組織或參與民主派「35+初選」的53人，芸芸被捕者中，有一個毫不起眼的單親爸爸，他開口閉口都是民生和弱勢；初選得票敬陪末席，卻與一眾民主派政治人物一起背上「涉嫌顛覆國家政權」罪名。嚴重弱智人士家長協會前主席李芝融被捕後，警方檢走了他的手機和電腦，10多年來倡議工作的心血結晶或化為烏有，更面臨失去與已去世女兒的回憶，但他仍堅持為弱勢發聲，花時間逐一聯絡朋友，希望找回文件存檔，「我希望我作為一個示範，畀佢哋（弱勢社群）知道親身嘅參與、親身嘅表達，先至最有力量，最有希望可以實踐到改變」。
嚴重智障者家長 初選票最低
李芝融去年打着民生旗號出戰新界東初選，取得304票，是眾候選人中得票最低。他本身是多個倡議團體的成員，包括嚴重弱智人士家長協會及關注社會開支聯席，較為人熟悉的是他多年來獨力照顧患嚴重智障女兒彥汶。彥汶2018年去世後，李繼續致力為弱勢群體發聲。
1月6日清晨，警方上門拘捕李芝融，並以調查為由檢走其手機及電腦。李嘆說，手機及電腦盛載多年來的心血和回憶，包括講座用的簡報、已找不回的政策文件、立法會財委會回應整合，還有女兒生前的照片和影片。他慶幸早前接受傳媒訪問時曾提供女兒的照片和影片，希望可取回存檔。「如果真係冇晒，我可能需要搵同我做心理治療嘅朋友。」他略帶激動的說。
做倡議十多年 文件逐份尋 曾供相受訪 女兒照片得保存
「真係心血嚟㗎，我整最近個貧窮報告都用咗4個鐘頭。」他說，現時只能憑記憶逐一聯絡曾接收過文件的朋友，看看對方有無將相關文件存檔，估計單是找回文件存檔至少需時一個月，「第一個念頭就係要重新做過囉，有啲無奈，唔忿氣」。近日他在社交專頁徵收一部二手電腦，有網友聯絡他說願意送贈一部全新的，卻遭他拒絕，「唔係好想人哋特登為我使太多錢，所以任何時候我都冇眾籌或者接受籌款，唔想人哋花太多錢喺我身上」。
早於2015年，李芝融已萌生加入議會的想法，但見當時議會內已有弱勢社群的聲音，經過一番掙扎後未有付諸實行。直至去年，時任立法會議員張超雄宣布退下火線，時任社福界議員邵家臻又因佔中九子案入獄，5年內未能參選，李擔心議會內無人為弱勢發聲，再次考慮參選，「如果將來個社會去到冇人理我哋嘅狀態，但有咁大需要，我係會嘗試嘅」。
稱不懂面對不同政治陣營 暫不參選立會
政府最終以疫情為由押後立法會選舉，經歷過初選與被捕，向來永不言棄的李說暫時不會參選，原因是不懂面對不同政治陣營的期望，「對於民主陣營，我唔能夠掌握其實𠵱家仲接唔接受議會有一種『左膠』嘅存在，但係對於建制陣營，我曾經係一個表露過我係支持民主自由嘅人，佢哋會唔會容許我嘅建議，或者係我嘅工作可唔可以順利進行？」他感到自己「兩面不是人」，但強調議會內仍需一個願意了解基層、為他們盡力的人，「我知我喺呢個時候承受唔起嗰種壓力，將來唔敢講，唯一選擇放棄係今次」。
「自己唔做就再少一個人做」
雖決定暫不參選，但他說會續做倡議工作，「我希望我作為一個示範，畀佢哋知道親身參與、親身表達，先至最有力量，最有希望可以實踐到改變」。他留意到社福界投身倡議工作的人愈來愈少，「冇得擔心，只可以揀做定唔做，因為愈嚟愈少人做，自己唔做就再少一個人做」。
昔父女常伴爭權益 今布偶代女陪入眠
身型瘦削的李芝融背着一個黑色大背囊，內裏除上吋厚關於弱勢社群政策文件，還有一個束馬尾女孩布偶。以往他受訪或行動時，身旁總有一個坐輪椅、插胃喉的嚴重智障女孩，她是李芝融的女兒彥汶。彥汶在世時愛抱着布偶入睡，如今換作李芝融擁着布偶入睡。女兒的出現，使藍領出身的李芝融敢為弱勢爭取權益，「佢令我走入人生第二個生命嘅起源」。
2008年彥汶因胃出血入院，一度危殆，李芝融幾乎放下一切全心照顧女兒，最後彥汶渡過危險期，「到佢好番我就諗，佢遇過呢啲狀况，遇過呢啲問題，就會諗佢嘅出現其實有咩意義，我就開始搵自己同個女存在意義同價值喺邊度」，他遂開始關注弱勢社群的政策，冀改變社會的想法。
李芝融曾做地盤、清潔、飲食等工作，自言學識不高，「我曾經攞住本中五會考書睇睇吓瞓着咗，所以睇文件對我嚟講係一件好難捱嘅事」。訪問當日他背着大背囊，裏面是一疊疊文件，都是關於弱勢社群的政策文件，他說有時會邊看邊打瞌睡，以往他公餘時間要照顧女兒，「每一日返工放工搭車，或者瞓覺前，唔使睇阿女就盡量刨，刨到幾多得幾多」。
不願組織消失 甘願背起包袱
他又形容自己不擅交際，「唔多望住人講嘢」。他對首次出席立法會公聽會仍歷歷在目，「嗰次上公聽會係我第一次喺嗰啲場面、咁莊嚴嘅地方講說話，我係一路講一路驚，隻腳不停震」。當時嚴重弱智人士家長協會主席準備移民，其他家長不敢接手，認為背負一個組織是很大責任，李芝融最後一刻站出來背起這個「包袱」，「如果我哋唔夠膽講自己嘅需要，其實我哋會被隱藏喺社會入面。我最先都係收埋嘅，因為面臨一種將會消失嘅狀態，所以唯有走出嚟。當時你只可以揀你做，還是冇咗（個組織）」。
加入社福界逾12年，女兒一直是他的動力和支持，以往兩人經常出雙入對行動及受訪，「睇見我個女慢慢由好怕生保、好冇安全感，變成享受同外界接觸，知道佢已經大個女，要獨立」。女兒2018年去世，未能陪他走下去，但他卻未有放棄幫助弱勢社群。
女兒是「第二生命」起源
他向記者介紹手中的布偶：「呢個係護士送畀佢，以前佢攬住佢瞓，𠵱家到我攬住隻公仔瞓。」他感謝女兒令自己找到生命意義，「我都畀佢影響咗，本身我係一個好內斂嘅人，變成我夠膽去唔同嘅地方講嘢，面對唔同人……我會形容佢令我走入人生第二個生命嘅起源。」他深信女兒即使不在身邊，依然是他心中的支柱。
沒有留言:
張貼留言