郭偉強當「復星/BioNTech」兩種疫苗 Emily

郭偉強當「復星/BioNTech」兩種疫苗

衛生事務委會發言出錯   EQ出聲糾正

Emily   06/02/2021

近期言行舉止都成為焦點嘅工聯會立法會議員郭偉強，噚日喺立法會衛生事務委員會會議又講錯嘢，誤以為香港最近批准緊急使用嘅「復星醫藥∕BioNTech」新冠疫苗係兩款疫苗。

    繼誤以為英國報章《衛報》（The Guardian）係世界衛生組織報章後，工聯會立法會議員郭偉強噚日喺立法會衛生事務委員會會議又有話題，佢以為香港批准使用嘅「復星醫藥／BioNTech」新冠疫苗係兩款疫苗，關注優先群組係咪只可以接種呢兩款疫苗，連委員會主席、民建聯葛珮帆（EQ）都忍唔住即時糾正佢：「復星同BioNTech，照我所知係一隻疫苗。」

「優先群組可等國產貨？」  葛：係自願性質㗎嘛

    郭偉強問食衛局長陳肇始優先群組係咪只能揀呢兩款疫苗，如果佢哋想等國產嘅科興或國藥嘅滅活疫苗，「又有無權去選擇呢？」葛珮帆忍唔住再出聲，話按佢理解，優先群組如果唔想打某種疫苗，當然係可以等。郭偉強鍥而不捨，追問係咪即係可以等到有滅活疫苗先打，葛珮帆話：「係自願性質㗎嘛。」

    唔少議員關注港人幾時可以接種國產疫苗，郭偉強提到國藥同科興剛剛交咗數據畀世衛，問陳肇始負責批准疫苗緊急使用嘅顧問專家委員會使唔使增聘內地專家，去輔助香港專家加快認識國藥同科興疫苗成效同數字。陳肇始就無正面回應呢個建議喇。