中囯模式 宋漢生

中囯模式   

宋漢生   09/06/2020

1. 由中国口中，話自己發明嘅中国模式幾先進，幾優越，係好有喜劇感嘅一回事。常識健全嘅人，係咁意都數到唔少原因，去質疑呢個claim。

2. 諾貝爾獎，頒咗一百二十年，第一名美國攞咗380次，第二名英國132次，小島國日本排第八，28次。

3. 人口第一嘅中国呢？Wiki話八次。八次裏面，一次係劉曉波，一次係作家莫言，一次係醫學界屠呦呦。另外五次呢？全部係外籍華裔。如果唔計，就算數埋中国唔承認嘅劉曉波，都只係得三次。三次係排第幾？無謂數嘞。

4. 嗰五個外籍華裔得獎者，如果一直留喺中国，會唔會有咁嘅成就？答案好明顯。五位之一嘅李政道，佢個年代好興「返祖國貢獻」，朋友問點解佢唔返，李政道答得乾脆：我不想被洗腦。

5. 中国制度對增加人類知識嘅貢獻，唔係零，而係負增值，仲要負好多。

6. 收窄啲個畫面，我哋IT行業，過去幾十年，推動行業向前行嘅，大大小小硬件軟件發明，都唔係好關中国事。費事講大國如美國，冇咗芬蘭，會冇咗Linux，冇咗日本，唔會有Ruby編程語言。冇咗中国呢？諗咗好耐，真係諗唔到人類有乜損失。

7. 再貼地啲，有得揀嘅人，佢哋向邊個方向流？而家係美國權貴走資走人去中国，定係中国權貴走出去？

8. 香港英國殖民時代嗰套，只不過係英國本土嗰套輻射出嚟大英帝國枝末嘅口水尾，但比起中国發明嘅任何制度，都文明得多。#你睇国安法一走後門植入香港，大家不分藍黃港外一齊走資就知。

9. 當然，其實優唔優越，要睇吓你由邊個角度出發。中共嗰套，對佢保住自己一黨專政，至少短線嚟講，可能真係好優越。「一黨專政」唔係人哋屈佢嘅，譚惠珠都話係，所以唔准嗌「結束」，會犯国安法。

10. 所以，中共成日話，英國佬喺香港留咗個炸彈陰佢，就算鑽晒空子，用晒程序暴力，出埋港英年代立而唔用嘅暴動惡法，結果都係搞唔掂班香港人。

11. 咁唯一合理做法，就係丟咗港英留落嚟嗰套，換返中国最耍家嗰套，收拾殘局，咁就係最好嘅示範，中国嗰套係堅優越。

12. 中国模式，喺中国好成功吖。Outlast咗蘇聯三十年嘅好處，係科技發達咗好多。以前，監控人民一舉一動，要用街道辦大媽。今時今日，中国用電子監控，更精準，更無遠弗屆。日日scan住，邊度一有異常細胞，即刻配合執法施法，重手消滅。

13. 洗腦教育加電子監控，喺中国行得咁好，好到諗住輸埋出去外國，軟件如Tiktok，硬件如華為5G等等。對付香港，如果唔係之前為咗吞併台灣，要顧及「一国兩制」嘅形象，一早就應該行一国一制。而家反正台灣敬酒唔飲飲罰酒，甚至連代理人韓國瑜都俾選民趕走埋，咁當然係時候拋開乜嘢中英聯合聲明等等嘅無謂枷鎖。

14. 所以，喺中国嘅世界觀，香港唔聽話，即係太鬆手，於是要收緊啲，如果都係唔聽，就再收緊啲，餘此類推，總會有成功一日，既然澳門可以珠海化，香港都可以澳門化，好聽話咁幫手搵錢。

15. 天下圍中，西方八國聯手成立IPAC對抗中国。香港本來係中西交滙嘅melting pot，眨吓眼，變咗自由文明同極權clash of civilizations嘅前線，九七之後再次成為世界焦點。從人類文明發展角度，Hong Kong matters more than ever。