Garbage in Garbage out 文、圖 : 林兆榮

童軍跳彈牀：Garbage in Garbage out

文、圖 : 林兆榮   21/06/2020

    教育局局長楊潤雄上星期指出，若學校對執行國歌法出現困難，可聯絡警方協助。

    就在這個早上，校長發現立仔早會唱國歌時咦咦哦哦，九唔答八一一一立即走近細聽，果然唱到成舊屎咁，決定大興問罪之師。

校長 : 「立仔 ! 你好大膽，點解唱國歌可以唱成咁？」

立仔 :「校長，我… …我… …普通話差吖嘛。如，如果我咁叻，我，我就唔使人呢度讀書啦。」

校長 :「你仲駁嘴 ! 而且，讀書廢都唔代表可以亂唱國歌 !」

立仔 :「校長，咁你唱嚟聽吓？」

校長 :「… …我，我點解要唱你聽？你走 ! 我搵訓導主任嚟，睇吓點煮死你 ! 你放學返嚟校長室，到時睇訓導主任點煮重你米 !」

下午

訓導 :「校長，今日有幾個同學犯事，包括有七名同學考試作弊，另外有班同學收埋違禁品。」

校長 :「我今日捉到個侮辱國歌 ! 呢啲小事你定奪啦。」

訓導 :「作弊呢，計我話就不如全體重測，一次唔識，測夠兩次、兩次唔識，測夠三次。測到佢識爲止。」

校長 :「咁好似係罰我哋噃，又要出過晒卷，又要無犯事回學受靶，最重要係我哋要再改過卷。其實係咪應該直接革扯佢哋？」

訓導 :「校長，我哋唔夠畢業生啦，好人好姐都唔會人嚟讀啦。再革扯幾個，恐怕好難同校董會交代啊。况且雖然佢哋詞不達意，言語無味，數日又差，品行麻麻，自我中心。但起碼佢哋都有氣有力，算係咁㗎啦。校長 不如對呢班年輕人網開一面啦。 」

校長 :「咁又係，出貓，即係緊張成績，都算『品格高尚』啦。佢哋只不過係填鴨式教育之下，滿身鮮血嘅受害者。咁不如… …重測，之後由得佢哋畢業啦另外一單違禁品係咩？」

訓導 :「違禁品係手提電腦，我哋一直唔容許同學帶私人電腦返學。」

校長 :「咁都好簡單，没收兼罰留堂啦。」

訓導 : 「問題係呢，電腦係佢哋副班主任高價賣畀佢哋。副班主任仲話 幫佢哋收起，唔會被人發現噃。」

校長 :「高價賣電腦？乜Tim Cook嚟咗我哋度教書咩？呢啲小事就算啦，講番『侮辱國歌』，我覺得你應該親自出馬，嚴加懲罰呢位同學，立仔。」

訓導 :「恕我直言啦一一老師喺學生面前，本來的確有些少震懾能力。但係衣家班學生，走出去街頭，對着警察都未驚過啦，你覺得就憑我哋幾件蛋散老師，學生會唔會放在眼內？如果係得，個個一早交齊功課，上堂無人瞓覺啦一一我哋搞唔掂喍。」

校長 :「如果搞唔掂，根據局長指引，即係要報警啦？」

訓導 :「頭先咪講過，佢哋警察都唔驚。」

校長 :「唔驚？你話呀？衣家坐監啊，唔係留堂見家長啊。淨係有個警察棟喺佢哋面前，佢哋都嚇到瀨尿啦。」

訓導 :「你咪警察咯，我咪警察咯，佢哋咪警察咯，呢度黃竹坑啊 !」
校長 :「咁一人派塊鏡畀佢哋自己照吓啦，佢哋見到自己個樣，一定嚇死 !」